Chìn前MIMI寄góan chia ê時, DJ tō有hoan咐講niau-á-kiáⁿ bē-tàng kā i剪指甲, tioh8 4月日大了後chiah thang剪, 若無, niau-á-kiáⁿ chhiâng-chāi peh-kôan跳kē, 驚無指甲khàng bē好勢, gâu siak--落-來. Hit-chūn in chhōa Amôu來ê時, mā有án-ne hoan咐.
Hit-kái chhōa Amôu去淡水ê「聖愛犬貓專科醫院」看是m7是感冒, 去到tè kā醫生講症頭了後, i隨講m7是感冒, 是披衣菌ê症頭. Koh看tioh8 Amôu ê指甲hiah長, 隨beh kā剪. Góan問講chiah細隻kám ē-sái剪? 醫生應講ē-sái, koh tioh8 tak8禮拜剪. Góan想講醫生講ê話ē信得chiah tioh8, tō放hōu i剪指甲, 灌藥á, 注射. Chit-chūn想--起-來, chiah發現 i連度針to無sa出來, koh khah免講檢查喘氣kap心跳--a.
過3工góan ài去東部, tō kā Amôu寄tī DJ in tau.
到i發燒, DJ chhōa Amôu去in熟識koh有信任ê「溫莎動物醫院」, kā探聽, 原來王醫師mā有熟識淡水hit-ê醫生, koh有niau-á寄in飼. 王醫師koh 1 pái kā góa說明, 是án-chóaⁿ niau-á-kiáⁿ bē-sái kā i剪指甲. DJ mā講in chiok久chìn前飼ê 1隻niau-á-kiáⁿ, 4月日大ê時kā剪指甲, 結果siak chit8-ē腦震盪死--去. I hit-chūn chhōa去hōu王醫師看, 王醫師chit8開嘴tō問in講是m7是有kā i剪指甲.
Kiám-chhái 10隻niau-á-kiáⁿ內底, 有8隻剪了無tāi-chì, m7-koh lín tau ê niau-á若像Amôu kāng款hiah jiat8, 無peh-kôan跳kē tō bē爽快, lí iáu是m7-thang kā剪, hōu i jiàu--tioh8是koh án-chóaⁿ? 總是khah贏出tāi-chì了後chiah來teh操煩.
PS. Lōu尾, góan判斷Amôu chìn前tō有lioh8-á發燒--a, 一直無注意chiah ē脫kah hiah-nī傷重, 燒kúi-nā工. 王醫師聽góa講chìn前ê症頭, i講he m7是披衣菌ê症頭.
無經驗ê人實在ài tiāⁿ請教有經驗ê朋友iah醫生. Koh, 頭1 pái chhōa niau-á去病院, siōng好先探聽--chit8-ē, koh khah好--ê是請有經驗ê朋友陪lí去, chiah知影tioh8注意siáⁿ.
沒有留言:
張貼留言