7月日記-1

[7/1]
Amôu 4月日大.
E-chái-á睏醒了後, 發現 i正後腳ê kian-phí-á lak(落)--落-來-a, kiám-chhái是 i teh走teh跳ê時去khê--tioh8-ê, 孔嘴iáu紅紅.

[7/3]
Eng暗teh khêng物件beh回收ê時, Amôu m7知tī時走來góa後壁, góa chit8-ē越頭beh行, soah kā踏--tioh8, i哀chit8-ē有夠大聲--ê.
Koh來góa入來房間內, i tī窗á邊hiông-hiông出怪聲, ná nâ喉有物á kéⁿ--tioh8, góa chhoah chit8-ē, kioh是 i toeh koh teh艱苦--a, koh peⁿ i ê嘴檢查. 緊hoah H入--來, i講是beh吐毛, 無要緊, góa chiah khah安心. Góan緊kā草á搬入來內底, i chit8看--tioh8 tō隨食--a, m7-koh lōu尾mā是無吐--出-來.

[7/6]
今á日chhōa i去注預防射(5合1疫苗), 後月日ài koh注1 pái. Chhōa Amôu去注射chìn前, 先抱 i去後壁看鴨á, kiám-chhái是bē慣勢出去外口, kài緊張. 去到病院, mā是一直beh mà來góa身軀頂, beh ài góa kā抱, koh chhoah bē停.

[7/8]
Chái-khí起--來, 發現Amôu頭殼頂腫1 lui, m7知kám是去khok8--tioh8? 有kā抹青草油.

[7/11]
L今á日kap Mother去韓國. 日時kan-taⁿ Amôu ka-tī teh顧厝, 真苦憐koh孤單.
下班tńg來到厝, 門chit8-ē開, i phì tī桌á頂, 隨喵喵叫, chông來腳邊, tòe前tòe後. 看 i碗內, kui工lóng無食ê款, kā抱入去籠á內, koh kā so-so--leh, chit8-khùn soah食kah chhun無kúi粒, m7知iau jōa久--a.
Lōu尾góa食飽teh洗碗無chhap--i, i tiàm廳--nih khok8-khok8叫, koh走來灶腳tī góa腳邊叫, he聲ná像teh kā人罵講lín是走去toh, kui工lóng無看leh人.
I嘴ta beh lim水, 盤á內無水, i tō坐tī桌頂盤á邊喵喵叫, 叫góa kā thîn水.
Góa若sió離開i ê身邊, tō隨喵喵叫; koh來tō一直kap góa sńg bih-sio-chhōe, 若無kā chhōe, i tō叫bē停睏, 若聽tioh8 góa ê腳步聲, i tō koh隨tiām--去m7出聲. 1 pái, i bih--leh, góa chhōe無 i, 行--過beh oat去別位chhōe, 行出房間, i tō緊chông--出-來, kā góa喵1聲, tō koh chông去別位bih.
Chit-má kā掠去放屎尿兼食飯, góa teh寫 i ê日記, i tī廳--nih koh開始叫bē停--a, ài來chhōe--i, hōu i sai-nai--a.

[7/12]
Cha暝hōu Amôu亂kah chiâⁿ無眠, 過1~2點鐘tō kā góa咬, beh叫góa去--來, m7知是日時無人tī--leh, 暗時精神真好, 想beh kap人sńg, iah是L無tī--leh bē慣勢, 真bē tiāⁿ-tioh8.
暗時下班tńg--來, i猶原tòe tiâu-tiâu, 叫kah真委屈. Mā koh一直beh sńg bih-sio-chhōe, 若bòai chhap--i, 無去kā chhōe, ē烏白叫, jú叫jú大聲, jú叫jú pháiⁿ; 若beh kā chhōe, tō歡喜kah chông來chông去sì-kè bih.

[7/13]
Ē-pou tng來到厝, 想beh先chhiâng身軀, tō腳步放輕行去房間. Chhím入--來, tō聽tioh8 Amôu tī thian(客廳) teh叫--a, góa choaⁿ-á先出去hōu i sai-nai. Kui ē-tàu tō án-ne tòe前tòe後, 若tòe無tioh8, tō喵喵叫, mā ē jú叫 jú pháiⁿ聽, bē-su teh kā góa罵--leh, chit-chūn tō ài緊去chhōe i, kā抱起來摸摸so-so--leh. 2工無看--tioh8, 有想góa ê款, ka-chài無白疼 i.