A-mô͘ Tāu-hoe: 2009-09

2009-09-30

TGB通訊第121期出刊 2009/10

http://taioanchouhap.myweb.hinet.net/

[目錄]

不滿beh an-choaN / Tek-hoa

Facebook, koh來leh? / Toa-thau-lian

飛翔的鷲鷹(2) / 林長昇

1 pai e風颱水災, 凸顯出國民黨政府e無能kap傲慢, 統治權力中心借機會重組, 台奸koh 1 pai hong sak出來chhit kha-chhng. 是講人換來換去, kam to e改變chit e體制結構? Kam to e解決che-che社會問題? 過去e經驗ka lan講: be! 顛倒製造/累積koh-khah che問題! An-ne lan ai ng望siang? 年底e選票iah天公伯--a?

2009-09-25

Mài tī góa seng-khu téng tah8 lâi tah8 khì…

Chit-chām-á chái-khí 6-7 tiám Amôu kap Tāuhoe thó-chiah8 ê sî-chūn, Amôu ē chē tī góa seng-khu piⁿ-á, ah nā Tāuhoe, i mā ē thiàu khí-lâi bîn-chhng5 téng, chiah koh ùi góa seng-khu tah8--kòe, kiâⁿ lâi kàu góa ê chím-thâu piⁿ, khai-sí chún-pī kā/chhoah góa ê thâu-mng5.

Chit-tōaⁿ sî-kan lâi, lóng chiok kiaⁿ in 2 chiah ē ùi góa pak-tóu tah8--kòe, ūi-tioh8 pī-bián chit-khóan chêng-hêng, góa lóng側睡(phóu-thong-sî-á tō khah chiap8 án-ne khùn--a), iah-sī kā thán-á kah tī pak-tóu téng, bô tō-sī chhiú khoeh tī hia.

M7-koh án-ne lâi, Tāuhoe soah ōaⁿ ùi góa ê heng-khám tah8--kòe, chit-má leng-á ē khah tiùⁿ, kiàn-pái i tah8--kòe lóng chiok thiàⁿ--ê.

Kin-á-jit8 Tāuhoe koh án-ne, góa tòng-bē-tiâu kā i pháiⁿ, koh iōng chhiú kā hòu-cháu, liân-sòa 3-4 pái. Koh lâi ōaⁿ Amôu mā siūⁿ beh ùi góa heng-khám tah8--kòe, i thâu-chêng kha tú chhun--chhut-lâi ê sî, góa tō kín kā póe-cháu, Amôu ká-ná chhoah-1-tiô, hōan-sè mā m7-chai-iáⁿ sī án-chóaⁿ góa beh kā pháiⁿ. Lōu-bóe Tāu-hōe koh cháu--lâi, góa kui-ê liah8-kông, chiok pháiⁿ kā i jióng, khòaⁿ--khí-lâi i ká-ná u chhoah--tioh8.

Chit-má siūⁿ--khí-lâi, kám-kak tùi in án-ne kài kóng bē-tit kòe, sī kóng hit-chūn iáu tng ài-khùn, tak8-kang hōu in án-ne chhá, ū-tang-sî-á chin-chiàⁿ ē tòng-bē-tiâu. Eng-àm tńg--khì chiah kā in sioh-sioh.

PS. Hôa kóng pài 2 chái-khí, i thiaⁿ-tioh8 Tāuhoe bîn-bāng teh ai ê siaⁿ. Hit-chūn Tāuhoe khùn tī kheh-pâng, Hôa kap Amôu lóng ū thiaⁿ--tioh8 siaⁿ, Amôu seng cháu--chhut-khì, Hôa mā kín tòe leh khì khòaⁿ, soah khòaⁿ tioh8 Tāu-hoe khun kah hó-sè hó-sè, i kóng èng-kai sī teh bîn-bāng.

2009-09-24

I mā ū--a!

Kin-á-jit8 e-chái-á tī pān-kong-sek, 204 cháu lâi kā góa kóng i ū--a… I ū-sin--a!!

Sit8-chāi sī chiok kiong-hí--i-ê, i kiat-hun 3 tang--a, siūⁿ beh ū gín-á, m7-koh it-tit8 lóng bô siau-sit. Taⁿ i mā ū--a, án-ne lâi, kong-si lāi-té tō ū 3 ê tōa-pak-tóu--ê-a! 3 ê lâng ê sî-kan koh lóng chha-put-to, taⁿ ū phōaⁿ--a, ha!

I kóng i pēⁿ-kiáⁿ ê chèng-thâu kài bêng-hián: sim-thiàu kín, ài-khùn, pak-tóu-tiùⁿ siūⁿ beh thòu. Thiaⁿ--khí-lâi kap góa kāng-khóan á kāng-khóan. Hit-chūn góa koh kioh-sī goeh8-sū beh lâi chìn-chêng ê chèng-thâu, chhin-chhiūⁿ leng-á tiùⁿ, pak-tóu tiù-tiù, sim-thiàu piàn kín…, lōu-bóe chiah chai-iáⁿ sī ū-sin liáu-āu ka-tī sin-thé ê piàn-hòa.

Lâng ê seng-khu piàn-hòa sit8-chāi sī chiok sîn-kî--ê!

2009-09-18

Hông kiông-pek thui-siau ê hū-tam

Ū 1 ê pêng-iú, chiok chē tang chêng khai-sí chiap-chhiok tit8-siau. Ùi i mi-chiⁿ--loh8-khì liáu-āu, kiàn-pái iok kìⁿ-bīn, i lóng sī teh thui-siau hiah-ê sán-phín.

Góa chāi-lâi tō tùi ài khai-chîⁿ ê mih8-kiāⁿ bô siáⁿ chhù-bī, koh-khah bián kóng sī chit khóan lâng teh kóng ê “niáu-chhí-á-hōe”, chu-pún chú-gī ê pōu-sòu. Chhím khai-sí góa koh ē chiâⁿ ū nāi-sim ûn-á kā pêng-iú kái-sòe góa tùi chit khóan sán-phín ê khòaⁿ-hoat, m7-koh bô-hāu! I jú phah-piàⁿ beh kā góa sòe-hok8. Koh-khah giâm-tiōng ê sī, jú lâi jú bô kî-thaⁿ ōe-tê thang kóng, nā ū mā liam-mi hōu i khan khì i beh thui-siau ê chú-tê.

Khòaⁿ i án-ne, put-tek-put phòe-hok8 kong-si tùi i ê “sé-náu”, lēng-gōa 1 hong-bīn, chit khóan sí-tîⁿ ê thui-siau hong-sek, soah hōu góa jú tò-tōaⁿ. Án-ne kúi-pái loh8--lâi, sit8-chāi sī kám-kak hū-tam chiâⁿ tāng. Nā bòai koh kap i iok, kám-kak sit-khì 1 ê pêng-iú, nā beh kè-siok8 kap i kìⁿ-bīn, tō-sī kè-siok8 hōu i thui-siau ê ki-hōe.

Aih~ sī án-chóaⁿ góa í-keng chiok bêng-khak piáu-tat8 mài koh kā góa thùi-siau hiah-ê mih8-kiāⁿ, góa mā bē bé, pêng-iú soah jú chhut-lat8 teh kiông-pek thui-siau? Chò pêng-iú kám tioh8 chò kah hū-tam chiah tāng?

2009-09-16

Kui kang lóng teh ài-khun

M7-chai sī sin-thé iah sim-lí in-sou3, tak8 kang lóng chiok ài-khùn--ê, it-tit8 kám-kak cheng-sîn bô hó. Tī pān-kong-sek ê sî, tiāⁿ ē tuh-ku, cheng-chha bô kui-ê lâng tit8-chiap phak tī toh-téng khùn.

Koh, siūⁿ beh thòu ê kám-kak mā put-sî ē chhut-hiān. Chhin-chhiūⁿ lé-pài tī chiat8-un téng-kôan, tō hiông-hiông kám-kak chiok bô sóng-khòai--ê, keng kàu Tek-ûi-á kín loh8-chhia thòu.

Hi-bāng sī sim-lí éng-hióng--ê, góa bô siūⁿ beh ū pēⁿ-kiáⁿ chèng-thâu ah!

Èng-kài ài khah kín kā ka-tī ê chōng-thāi tiâu-chéng hōu hó-sè, chiap-siū hiān-sit8 hoat-seng ê tāi-chi.

2009-09-10

Ì-gōa jîn-seng

Khui chit ê blog, pún-té sī ūi-tioh8 beh kì-lok8 A-môu kap Tāu-hoe, taⁿ, ka-tī ê jîn-seng chhut-hiān tōa piàn-hòa, soah ōaⁿ chò kì-lok8 ka-tī…

In-ùi té-khòng bē-tiâu sī-tōa-lâng ê kong-sè, 7--goeh8 koat-tēng kiat-hun. 7/18 kóng chhin-chiâⁿ. 7/19 Tiông-seng soah hiông-hiông lī-khui, hōu lâng bē-hù hóan-èng.

9/1 chiah koh teh khèng-chiok 2 ê lâng chò-hóe 10 tang, keh-tńg-kang tō hoat-hiān ū-sin--a! Ū-kàu tōa ê ì-gōa... sûi ùi 1 ê lâng pìⁿ 2 ê lâng, 2 ê lâng pìⁿ 3 ê lâng.

9/4 khì pēⁿ-īⁿ khak-jīn, ū khòaⁿ-tioh8 iáⁿ ah, 0.3 cm. Kóng sī 6-8 lé-pài tōa, góa khòaⁿ sī bô-iáⁿ, góa ka-tī ê phòaⁿ-tōan èng-kài sī 1 goeh8-jit8 chha-put-to. Koh, i-seng hōu góa thiaⁿ ê sim-thiàu-siaⁿ, góa siūⁿ èng-kai sī góa ê.

Chóng kóng 1 kù, tī góa 30 hòe chit tang, góa beh kiat-hun, chò ma-ma--a.