8月日記

[8/1]
Amôu 5月日大.
E-chái-á 5:30放豆花出--來, in 2隻一直sńg到taⁿ (10:00) koh bē-thiám. 9點ê時2隻lóng teh ài睏--a, m7-koh Amôu若走--出-去, 豆花tō目chiu金金相teh chhōe Amôu. 2隻黏tiâu-tiâu, 感情chiok好--ê.
中晝豆花竟然tī Amôu ê貓砂放屎!
今á日中晝到ē-pou, Amôu koh kā góa pàng-sak, 去thian陪豆花睏--a.
豆花經過kúi-pái“暴動”了後, 身軀mā kō kah chiok臭--ê, Amôu mā kō tioh8 i ê “氣味”. Eng暗kā in洗身軀, 2隻lóng下性命反抗.
Beh kā Amôu洗chìn前, i koh跳起lih水chô-á teh jiàu, houh~houh~ i chit-má hōu góa看破腳手--a, góa緊kā抱--起-來, m7-koh bē赴--a, 尿sōan--出-來-a.
豆花chit-má mā lóng用Amôu ê貓砂, ka-tī ê貓砂lóng bòai用. 橫直tō是Amôu teh chhòng siáⁿ, 用siáⁿ, i lóng tòe-tiâu-tiâu, tòe leh學. 像tī露台mā是, Amôu若teh食草á, i mā beh食草á; Amôu若bòai食草á, tī塗腳teh sńg, i mā beh落去塗腳sńg.

[8/3]
Cha-hng暗無kā豆花關, 2隻lóng tī房間睏.
中晝睏醒, 2隻睏tī góa雙pêng.
食暗ê時, 無細膩hōu豆花偷食tioh8 1 tè豆乾, beh kā搶--tńg-來ê時, 豆花ê嘴咬ân-ân, ngē死to m7放.

[8/6]
拜6 U煮魚á湯, Amôu tō一直顧tī灶腳. 今á日ē-pou hiông-hiông發現 in 2隻ùi pùn-sò桶kā報紙咬--出-來, teh chhńg食chhun ê魚肉iù-á......
Koh, in 2隻sńg kah Amôu ê鼻á破皮, 豆花倒 lúi目chiu sió-khóa腫--起-來, houh~ lin chit 2隻khah chām-chat--ê-lah!
Eng暗Amôu注第2 pái ê “5合1”, 豆花注頭1 pái, koh theh8 1罐目chiu藥á.

[8/8]
今á日豆花摸--起-來chiok燒--ê, kui工lóng無精神, mā bē kap Amôu sńg, koh有漏屎. Chhōa去hōu醫生看, 有發燒40度5. 注2隻射: 退燒--ê kap止漏--ê. Bîn-á-chài ài koh chhōa去檢查.

[8/9]
M7知án-chóaⁿ, 今á日Amôu叫kui工. Eng暗chhōa in 2隻去病院, 豆花iáu是有發燒, 39度9. Amôu mā有發燒, 39度7. In 2隻lóng注2支射: 退燒--ê kap抗過敏. Bîn-á-chài ài koh chhōa--去, 若koh發燒, tioh8-ài抽血檢查--a. 醫生講豆花ê問題khah大, 驚是本底tō有siáⁿ-mih問題, 預防射注了gia--起-來, 若án-ne, Amôu mā有可能hōu i òe--tioh8.

[8/10]
Ē-pou koh chhōa in 2隻去檢查, ka-chài, 無koh發燒--a, 豆花38度外, Amôu 39度.
M7-koh到暗時, 過24點鐘藥效退--去了後, 豆花ka-ná koh燒--起-來, góan ka-tī kā量, 40度; Amôu 39度1正常. 緊koh chhōa豆花去病院. Tī病院量, 豆花是40度3, 緊koh注1支退燒--ê (若無, 一直發燒ē造chiâⁿ『器官衰竭』). 醫生講ài留--落-來觀察, mā khah免一直chhōa來chhōa去, 必要ê時, ài抽血檢查.
Tńg--來了後, Amôu看無豆花, 一直叫, koh行來行去teh chhōe, góan kā講豆花破病tòa tī病院, bîn-á-chài tō ē tńg--來-a, i ka-tī mā ài khah健康--ê, 等豆花tńg--來koh chò-hóe chhit-thô. M7知 i聽有iah聽無, lōu尾khut tī椅á睏, m7-koh 1段時間tō ē起來叫, mā直直看外口.
Eng暗12點外koh kā Amôu量, kāng款39度1正常.

[8/11]
Eng暗去病院看豆花, 醫生講 i無koh發燒, mā無吵, lóng乖乖tī籠á內睏.

[8/12]
今á日病院無開, 無法度看豆花.
豆花無tī--leh, Amôu lóng一直叫, 外口若有siáⁿ-mih聲, i tō隨衝去客廳, tī門嘴teh聽......

[8/13]
Eng暗病院khà電話來, 講豆花chit kúi工tī病院lóng正常, ē-sái kā豆花chhōa--tńg-來-a!「上哲動物醫院」無kā góan收錢!
Chit8 tńg--來, Amôu tō thiòng kah一直kap豆花sńg, m7知án-chóaⁿ, 豆花soah koh燒--起-來. 緊催電話kā DJ討救兵, i講hōan-sè是sńg siuⁿ過頭ê關係, 叫góan hōu豆花ke lim水, kap i講話, kā i摸, hōu i hioh-khùn. 真正有效! Góan beh睏ê時, 豆花tō無hiah燒--a.

[8/23]
豆花4月日大.

PS. 接續kúi-lō工, góan lóng照DJ講--e, mā bòai hōu豆花sńg siuⁿ久, koh來tō lóng m7-bat koh燒--a. 照chit-lō扮勢看--來, hōan-sè是DJ講--e, sńg siuⁿ過頭thiám, 體力bē tòng--ê.